سر التجلي : سبب ضهور السلبي و الإيجابي في الحياة
هو إنت هتصدقني لو قلت لك إني وصلت لأسباب تجلى و ظهور أي حاجه في حياتنا ؟ يعني الأشخاص بيظهرو ازاي؟
وهل أقدر أغير ظهورهم يعني أبدل سيء بكويس ؟ و كذلك الأحداث والأشياء وحتى الكائنات والاماكن . هل أقدر أتحكم في ظهورهم حسب تفكيري و افعالي و مشاعري ؟
عموما كده كده مش هقدر أقنعك إلا لو كنت لمست حاجه من اللي هقولها في حياتك, غير كده لو حلفت عالمية تجمد مش هتصدقني. ببساطه كده احنا عايشين وفق قانونين مهمين جدا و كل حاجة بتظهر في حياتنا راجعه للقانونين دول
١- القانون الأول اسمه : قانون التركيز
و هو بسيط قوي, بيقول ان كل ما تركز عليه و تراه بوضوح في عقلك يزداد يعني انت شايف بوضوح في عقلك مثلا ان مراتك نكديه, هتكون نكديه لك وحدك و هتكون مع الغير حسب كل شخص شايفها ازاي
واحد هيقولي طيب يعني انا لو شايف اني غني و عندي فلوس كتير هبقي غني؟ هقوله آه, بس يا حبيبي في عمق عقلك انت شايف ايه بوضوح
بص كده
آآآآآآه شفت
انت شايف إنك عايز فلوس كتير عشان تخرج من الفقر
يعني يا جميل انت شايف الفقر ب وضوح
لو قدرت تمحي الصوره دي و تحط مكانها الوفره هتأتي الوفره
في حاجات كمان بتساعد على زياده وضوح الصوره دي في عقلك, زي مثلا رفضك للأشخاص و كرههم و ضيقك منهم
بيخليك شايفهم بوضوح فبيزيدو
زي شكوتك من الأشياء و البلد و المدير و زوجك و عيالك و الحكومه و الأحداث ,كده انت شايف السلبي بوضوح فبيزيد
انا طبعا عاذر البرمجة اللي خلتك شايف السلبي بس و عارف أن تغييرها عايز وقت و انت قدامك كل الوقت تغير كل الصور اللي اتعودت تشوفها و ترسم اللي عايزه
٢- القانون الثاني : اسمه قانون الكارما
و ده ابسط من اللي قبله و هو ان كل ما تفعله بيرتد لك سواء خير او شر و مش شرط أن اللي بيرتد لك يكون من نفس النوع. اللي بيطلع منك بيتحط على الميزان الرباني و يجيلك حاجه على نفس الوزن و الذبذبات
يعني مثلا تعطي فيجيلك يسر
تظلم نفسك فيجيلك اللي يظلمك
تشتكي فتتقص النعم
تمتن فتزيد النعم
تبخل يجيلك عسر
تغتاب حد فمديرك يهينك
تحقد فيجيلك ورم
تتعامل برفق مع كلب فيخف مغص بطنك و هكذا
انا مش عايز اذكر امثله كثير عشان ميطولش حجم البوست لان البوست ده عايز كورس كامل أو كتاب لو اتكتب بالتفصيل
لذلك عايزك تفهم الكلام و تقعد مع نفسك تسقطه على حياتك و تشوف الحاجات اللي ظهرت في حياتك سواء أشخاص او أحداث او اشياء او كائنات راجعه لأي من القانونين و إبدأ شوف هتغير الصور ازاي أو تغير ما هيرتد لك ازاي
و عايزك تضع في الاعتبار ان ده مش اختبار يوم و لا شهر
دي طريقه هتعيش بيها, هتحلل سبب ظهور كل شيء في حياتك و طالما في شيء سلبي يعني انت بتعمل حاجه من اثنين, يا إما هو صوره خلقتها بعقلك, يا إما كارما مردوده لك
لذلك إبدأ من دلوقتي اعمل كشف حساب و إكتب قائمه باللي موجود كصور ذهنيه في عقلك و كذلك كل سلبي بتعمله
و استبدل الصور السلبيه بصور جيده و داوم عليها و كذلك لو في اشياء معندكش صور ليها في عقلك إبدأ حطها من دلوقتي عشان تتجلى بعدين, و تاني حاجه راجع كل شيء بيرتد منك سلبي و حوله لإيجابي و أعتقد اني كتبت في منشورات كتير ليا قائمه بالاشياء السلبيه دي و بديلها الايجابي
متقرأش منشوراتي وتقولي تسلم ايدك مشكور, انا مش عايز منك حاجه غير انك تسمع القول فتتبع أحسنه. كل بوست بكتبه بيكون زي كورس او ماده تعليميه, اتعامل معاه انه محتوى او درس للتطبيق مش منشور للقراءه العابره
لا تخرج قبل أن تقول نويت التغيير و تبدأ التطبيق
إقرأ أيضاً قانون النّية الكوني – السّر وراء التجلّي بالضغط هنا