أقوى النصائح إن كُنت تعاني من مشاكل في الصداقات او العلاقات
اذا كُنت تعاني من مشاكل في الصداقات او العلاقات فسأقوم بإهدائك نصائح تساعدك لتكوين علاقات افضل مع الأصدقاء, فتقبلها بحب لأنها اضافت لي صداقات ذات جودة افضل
صديقك ليس ملكك وحدك، من حقه ان يختار ويصادق اشخاص قد لا يعجبونك او لاتطيقهم, وقد تكون بحاجة ان تتقبل اختلافهم عنك وخيارات الاخرين ويكون لك ايضاً خياراتك المُختلفه عنه
عدو صديقك ليس عدوك، وعدوك ليس عدو صديقك، فلا تقحم نفسك في معارك ليست معركتك، انت مسؤول عن نفسك، واسمح للآخرين ان يعيشوا معاركهم ويتعلموا وينضجوا من خلالها، ممكن تقدم له النصيحة بحياد لو هو استشارك. لو ما استشارك ركز على نفسك وخياراتك واستمتع
نوع في صداقاتك وكُن منفتح على صداقات اخرى، لا تجعل علاقتك مركزة على صديق واحد وتغلق بقيه الفرص الجيدة، لأن ذلك قد يشعرك بالقلة والشُح، وقد يجعلك اكثر تحسس واعتماد و ممكن يعمل فائض احتمال يدمرها
خليك منبته ايش الشعور اللي قاعد يضيفه هذا الصديق لحياتك ؟ وايش الشعور اللي يسعده وتضيفه بحياته. جيد يكون في تبادل بينكم ولو على صعيد المشاعر وهذا لايعني انك تطلب منه يقدم شي ما يحبه والعكس. لأن الهدف من الصداقات ان يكون وتكون اضافه ممتعه في حياتكم
اكثر صفه مهمه بنظري ممكن تنويها في الصداقه هي ان تجد صديق يفهمك و يتفهمك، لأن كثير بتقابل اصدقاء يشعرون بك بس مو الكل بيفهمك
الوضوح والصراحه اهم صفتين لإستمرار الصداقه، فإذا بخاطرك شي صارحه بكل لطف عن اللي يزعجك، واذا اللي يزعجك اشياء كثيره، فممكن انه صديق غير مناسب لك، او انك تحتاج مزيد من القبول واحترام لشخصيته المختلفه عنك
وجهه بل ما تروح تتشكى منه لغيره، هالشي ما يدل بنظري انك صديق جيد
اذا جذبت صديق يغار منك، فدرسه يعلمك تستيقظ وتقدر النعم اللي عندك واللي غيرك يتمناها وانت مو مدرك اهميتها, واذا دايم تجذب اصدقاء يغارون منك فراجع نفسك، ممكن انت تفسر كل تصرف غيره، او انك بدون وعي منك تستفز خوفهم، او داخلك خوف يجعلك تجذبهم وتعيش هالمعركه
الهدف الحقيقي من تكوين الصداقه اننا نكون افضل معاً، قد تضطر تتحمل قريب او زميل عمل، بس منت مضطر تتحمل صديق تدخله حياتك ويزيدها تعاسه ونكد. الهدف من الصداقه انك تسعد معه ويسعد معك
مو لازم تلاقي في صديق كل الأشياء اللي تحبها، ولا مطلوب منه يتغير عشان يكون باكج كامل فيه كل شي تريده
فيه المؤنس اللي تسعد بوجوده، وفي النجّي اللي تبوح له بأسرارك وانت مطمئن، وفي المصاحب اللي تستمتع بالخروج معه، وفيه الفزعه..وقليل تجتمع في واحد
صديقك المختلف عنك هو اكثر صديق بيوسع ادراكك تجاه الحياة اكثر من صديق انتم متشابهين في كل شي. قلت ( مُختلف) والإختلاف لايعني الخلاف او السوء في الطباع والخُلق، انما خيارات وسلوك مُختلف, لا تخاف من المختلفين الاختلاف ليس شر، الإختلاف تنوع
اصدقائك هم مرآتك لنفسك، في كل مرحلة بتنسجم مع الأصدقاء اللي يشبهونك فيها، فإذا تبي تعرف انعكاس داخلك ونوعية جذبك، راقب نوعية الأصدقاء اللي حولك في مرحلتك ف ( المتشابهات تتجاذب) على نفس التردد ونفس الطاقه
مجرد ما تتغير يا يتغيرون معك، او تتفرقون وتلتقي بالأنسب
التقدير مهم في في استمرار العلاقات، قدر الأشياء اللي يضيفونها في حياتك ابسطها واعظمها، واشعرهم بتقديرك لذلك واشكرهم على كل دور جميل يضيفونه. هالشئ يشعرهم انهم يقدمون للشخص الصح ولا تطالب منهم شي فوق طاقتهم، ترى محد ملزوم بأحد
احترم صديقك في وجوده و في غيابه، لا تسمح او تشارك اي شخص يقلل منه أمامك او يشتمه
الناس تحترم الصديق الجيد والقوي, وتزهد بالصديق الضعيف بإختصار تعامل معه مثل ماتحب هو يعاملك
الصديق اللي يتشكل معك و تتطور معاه، ويتقبلك في صعودك وانخفاضك هو الأكثر استمرارية معاك من الصديق الثابت، الثابت يبطئ حركتك، وكل مره يذكرك و يبيك ترجع لنسختك القديمه اللي اعتاد عليها غير مدرك انك قادر تصنع نسخه افضل، وبالتالي تصير الفجوة
اكرر الصديق مو لازم يجيك ( باكج كامل) في كل المواصفات الي تبيه ا( شكلياً وفكرياً ومادياً ونفسياً )، خذ من هالصديق اللي يخدمك ويسعدك بالعلاقه، وكمل مع بقية الأصدقاء الشي اللي ناقص. فيه صديق تخصص مغامرات، وصديق يضحكك، وصديق ينشد به الظهر في المواقف الصعبه..الخ
رتب قائمة اصدقائك في كل مرحلة، لأن الطبيعة البشرية مُتغيره، والتناسب يختلف، واجعل كل صديق في مكانه المناسب, بعضهم الافضل تقربهم، وبعضهم الافضل تخفف من علاقتك معه مع كامل الإحترام والتقدير لوجودهم جميعاً وتقبل هالشئ منهم
اعذر صديقك في مرحلته القادمة، مثلاً اذا تزوج او توظف او انطلق بمشروع, اكيد بينشغل واكيد ظروفه بتكون مختلفه عن قبل. اذا بتجلس تتشره وتقارن وتطالبه يكون مثل اول انت جالس تثقل عليه بدل ما تساعده, قدر مرحلته الجديدة بكامل ظروفها عشان الآخرين يقدرون مرحلتك وظروفك
اذا الله عطاك صديق افضل منك حظ في المال والجمال والعلاقات وشعرت بالغيرة منه! اشتغل على ثقتك بنفسك وارفع استحقاقك لانه باختصار يمثل نسختك الجديده, فيا تدمرها بغيرتك ومقارناتك او تتصل فيها وتتعلم منه وتوصلها وتتجاوزه بإستحقاقك وانفتاحك
مافي شي اسمه صديق العمر ، الكل قابل للتغير والتبدل، ومن الخطأ تبني توقعات عالية تجاه اي شخص، لاترفع سقف توقعاتك ثم تُصدم، ولا تثق في احد ١٠٠%
خلك منفتح لكل شئ وبابك مفتوح للي اختار يرحل، ودائم فكر بالبدائل الأفضل لأنك في تطور مستمر، فمو الكل قادر يتوافق مع نسختك الجديدة
صديقك مو مطلوب منه يقول لك كل خصوصياته، ولا مطلوب منك تقول له كل خصوصياتك وتكون كتاب مفتوح ثم تلومه اذا ما بادلك. احترم مساحته الخاصة، وساعده يحترم مساحتك الخاصه, فكل شخص نكشف له الشى الي احنا مستعدين له ونشوفه مناسب وبيضيف لنا شي يفيدنا فيها
فرق بين العمل والصداقه : لايعني ان صديقي صاحب مشروع انه ملزوم يعطينا كل شئ مجاناً, ولا انت ملزوم تباشر عليه بكل شئ من عملك. الشي اذا جا من طيب خاطر ولا مو لازم, وانت اولى تدعمه ويدعمك في رزقك وتكونون عون لبعض في توسعكم بدل انتظار كل شئ مجاناً او الإعتماد عليه ولومه
صديقك مو مطلوب منه يكون على توقعاتك, ولا انت مطلوب منك تكون على توقعاته ولا تسمح لأحد يفرض عليك اشياء انت ماتحبها. اللي يحبك بيقبلك كما انت بشخصيتك ولطفك, المهم لا تؤذي احد
الصديق وقت الضيق, بس لايعني ان كل ضيق لازم يكون معك. كل شخص له قدراته وامكانياته, بعضهم بيفيدك مادياً، وبعضهم، نفسياً، وبعضهم بيعطيك حلول.. الخ و بعضهم قدرته يكون مستمع جيد لك, فلا تلوم صديقك على شئ خارج امكانياته
قدر انشغال صديقك، غيابه، ظروفه الي ماقدر يبوحها لك و إلتمس له العذر, اذا بتقدم له شي قدمه من حب وليس من باب ( عطيته و ما عطاني). اذا لاحظت ان مافيه تبادل، توقف عن كرمك و اعطه بقدر مايعطيك وفك عمرك من الشرهات والمقارنات. ساعات احنا الي نحتاج نتغير بدل مانطالبهم بشئ مايقدرون عليه
إقرأ أيضاً
دلالات زيادة الوعي
كارما العلاقات
سبب الخلافات و النزاعات في العلاقات : روبرت سبيرا
كيف أعيش قصة حب ناجحة ؟ أسرار نجاح العلاقات العاطفية
اختبار شخصية يُبيِّن درجة الذكاء في العلاقات
العلاقات الروحية : لماذا لا تستمر، أو تتعطل أو تتكرر