كيف تفهم الرسائل الكونية بطريقة صحيحة ؟
ازاي تفهم الرسايل الكونية صح ؟ و ازاي تفرق بين الرسالة و بين عقلك الباطن ؟
ربنا بيكلمنا كل يوم عن طريق الرسايل والاشارات, الرسايل نوعين في رسايل واضحة وضوح الشمس ، و في رسايل غير مباشرة تحتاج تحليل و تفكير و تأمل و طرح اسئلة. الرسالة الواضحة مثلاً : تلاقي جملة مكتوبة في مكان واضح او تقرأ بوست تلاقي فيه إجابة علي سؤالك ، نصيحة من صديقك ، معلومة في كورس ، المهم إن الكون دايماً بيقومك و بيوجهك و يصحح طريقك لما تبدأ تبعد شويه عن طريقك الأفضل و رسالتك ( الي انت ممكن تكون لسه متعرفهاش) اتطمن الكون عارفها و بيوجهك ناحيتها عن طريق الرسايل الي بيبعتهالك كل يوم, ثق في ربنا ، ثق في الحياة ، ثق في المجهول
و كل ما هتبقي شاطر في فهم الرسايل الواضحة كل ما وعيك هيزيد و تستحق فهم الرسايل الغير مباشرة ، الي بتحتاج منك جهد و وقت و بحث و انك تسأل حد عليها. الأحلام فيها رسايل و فيها تفريغ للعقل الباطن من مشاعر و افكار, طيب ازاي افرق بين الرسايل الكونية و بين عقلي الباطن ؟
الترمومتر هو مشاعرك ، هتلاقي فجأة مشاعرك اتلخبطت, هتلاقي دهشة غير عادية تأكدلك ان دي رسالة ليك انت بالذات ، هتلاقي الرسالة بتتكرر بشكل مستمر لأن من سمات الرسالة انها تستمر تجيلك لحد ما تفهمها و تتطور بس في الأول بتكون هادية و لو مخدتش بالك ، بتصعب و تؤلم عشان تشوفها و تفهمها لأن ربنا بيحبك و يحبك تبقي أحسن
الرسالة تختلف من شخص لآخر ، ممكن نفس الموقف و لكن كل شخص له رسالة مختلفة عن الآخر. طيب ازاي أعرف الاشخاص الي حولي الي يحملوا رسالة لي ؟
أولا العائلة بتكون رسالتهم طويلة المدي و رساليهم مهمة ، الشاب الي متعلقه بيه ، او البنت الي متعلق بيها ( رسالة ) الأصدقاء و الأشخاص الي أثروا فيك و فحياتك بشكل كبير سواء ايجابي او سلبي هما كمان ليهم رسايل مهمة ليك. طيب انا فهمت إن الأشخاص دول حاملين رسايل لي, عاوز اعرف ليه الاشخاص دي ظهرت في حياتي و استفيد ازاي منهم ؟
عشان تعرف رسالتهم هتسأل نفسك تلات اسئلة
ايه اكبر ميزة انت شايفها في الشخص دا ؟
ايه اكبر عيب انت شايفه في الشخص دا ؟
ايه اكتر شئ بيستفزك في الشخص دا ؟
لإن أكتر شئ بيستفزك هو انعكاس لشئ رافضه جواك, ممكن تلاقي الميزة الي عنده عندك انت كمان بس انت مش مستغلها صح ، او العيب الي عنده انت محتاج تشتغل عليه, مثال علي شخص مش لاقي حد يحبه ، كل ما يتعرف علي حد يستمر معاه شويه و يسيبه .. تفتكر ليه الكون بيعمل معاه كدا ؟
فعلاً رسالة الشخص دا إنه مش بيحب نفسه و مش بيحترم و مش بيقدر نفسه و مش فاهم نفسه, فالكون هيستمر يبعتله اشخاص مزيفيين ( ومش هيبعتله اشخاص حقيقيين يحبوه بجد.. لان الكون منتظره يحب نفسه الأول) و حتي لو في اشخاص حقيقيين في حياته هيكونوا بيعطوا الحب دا لأشخاص آخرين و هو لا أو يعطوه فين و فين, المهم انه لا يستفيد من وجودهم في حياته. فلما يفهم الرسالة ويحب نفسه هيلاقي الكون بيبعتله كل الاشخاص الي يزودوا الحب دا في حياته و كل ما بقيت حقيقي مع نفسك اكتر كل ما فهمت رسايل الحياة اسهل و اسرع
الخلاصة
انك لو ماشي صح هتلاقي الدنيا سالكة معاك ، و لو في لخبطة تعرف انك ماشي غلط ، توقف و راجع حساباتك و افتكر انك المسؤول ، و راقب الغيبة و النميمة و الغضب و الأحكام و ركز علي التسامح و الحب و الرحمة ، و تذكر دائماً ان لو عاوز حياتك تتغير أنفق مما لديك ( قوة تساعد بيها حد – معلومات تفيد بيها غيرك – فلوس و لبس تيسر بيهم حياة حد ). كل ما هتنفق أياً كان الشئ بسيط في عينك فأنت بتستحق الخير و الوفرة من الكون ، و كل ما انفقت في التعلم كل ما ساعدت نفسك انك تفهم الرسايل اسرع و بأيسر احتمال
إقرأ أيضاً
عاصفه الوعي و الرسائل الكونية
لويز هاي قانون الوفرة الكونية : هام جداً
الإشارات و الرسائل الكونيه التى تحذرك عندما تكون على الطريق الخطأ
تحميل كتاب أنت الكون اكتشف ذاتك الكونية واعرف أهميتها
القوانين الكونية الإثني عشر مختصرة
علامات تدل على أن الكون يحاول إخبارك بشيء ما
نظرية الأبعاد الكونية : شرح شامل لجميع مكونات هذا الكون (رائع )