ليه اخترت تنزل الأرض ؟
بدأت الحكاية لما كنا أرواح في عالم الأرواح، ربنا نفخ فينا من روحه ومن وقتها و روحك هتستمر خالدة الي الأبد
الروح لا تفنى لانها طاقة والطاقة لا تفني، انت الحقيقي خالد بخلود الخالق أما الموت ما هو إلا انتقال من حياة لحياة أخرى
١- طيب آيه صفات الروح دي ؟
الروح عندها معلومات, إنها في تجربة من أعظم تجارب الكون اسمها التجربة الأرضية ( الحياة هنا علي كوكب الأرض ) عندها معلومات لكن من غير مشاعر وهوضح يعني ايه
٢- طيب ليه قررت تنزل اللعبة دي ؟
عشان تتطور بإنك تحس كل المشاعر وتطور من عيوبك وتنشر رسالتك في الارض وتتواصل مع الخالق
٣- إزاي أنا اخترت أنزل الأرض ؟
عارف لما بتحمل لعبة وتختار الشخصية اللي هتلعب بيها وتختار اللبس وذكر ولا انثي وتختار المكان اللي هتنزل فيه وتختار الأسلحة اللي هتساعد الشخصية وتختار عيوبه هو دا بالظبط الي عملناه ، انت اخترت الدور اللي هتلعبه و الشخصية والجن.س والجنسية والمميزات والعيوب واخترت الناس اللي تساعدك أولاً بإنها تفكرك بحقيقتك إنك مش جسمك ولا أفكارك ولا مشاعرك إنت الروح النقية النورانية الطاقية الخالدة مهما تشوهت عندك المفاهيم والدنيا تاهت ومش عارف انت رايح فين وجاي منين ، افتكر إن جواك مرشد داخلي بيكلمك بس صوته هادي ولما تتحكم أفكارك هتقدر تسمع الصوت دا, واخترت كمان الناس اللي تساعدك أي عائلتك الروحية, كل واحد فينا اختار إن يكون ليه عيلتين ، العيلة المادية اللي اختار إنه يتولد فيها ودي من أهم اختباراته لإنهم أكبر انعكاسات لينا عشان كدا أغلبنا كُنا مش طايقين أهلنا لحد ما عرفنا إنهم مرآه لعيوب جوانا فبالتالي هما متطوعين ومْعلمين وبيساعدونا
٤- امتى هتتعرف علي عيلتك الروحية ؟
بعد ما بتستيقظ وتتعلم وتنوي إنك تتغير وتتطور بتبدأ تتعرف علي أفراد من عيلتك الروحية, ناس بتحبها لله في لله كدا ، تحس إنك تعرفه من زمان ( يمكن لإنكم اخترتوا بعض وانتوا أرواح ) بيبقي زي أخوك واكتر و زي أختك واكتر ، بتتعرف عليه و بيدخل حياتك في الوقت المناسب لما انت تكون مستعد ، مش عليك غير إنك تتطور وتشتغل علي نفسك وهيدخل في الوقت المناسب
ومش بس اخترت الناس اللي تساعدك بحب, لا إنت كمان اخترت الناس والمواقف اللي تساعدك بشدة في حالة لو نسيت حقيقتك ونسيت إنها لعبة وخدتها جد ( ودا شرط من أهم شروط اللعبة النسيااان ) فإنت حالياً بتمر بمرحلة تذكر للي إنت اخترته بس نسيته ، لإنك لو فضلت متذكر اللعبة هتبقي بايخه ، متعتها في نسيانها ، خد نفس عميق وتعالي نتذكر سوا إن
الشركة اللي نصبت عليك كانت بإتفاق منك
زوجك اللي بيهينك ويقلل منك بإتفاق منك
أهلك اللي بيجبروك ويتحكموا فيك بإتفاق منك
الناس اللي بتشتكيلك وتبتزك عاطفياً بإتفاق منك
الناس اللي بتتطفل عليك وتدخل في خصوصياتك اتفقت معاهم إنهم يساعدوك عشان تتعلم
متخليش حد يضحك عليك
تقدر وتحترم نفسك وتتعامل بحزم حين يتطلب الأمر
تعطي حرية للآخرين وتتقبل كل واحد حسب مرحلة وعيه
متتدخلش في حياة حد بغيبة ونميمة أو سوء ظن أو فضح أو محاسبه الآخرين بكلام سلبي أو سخرية
شوفت الحياة بدأت تحلو ازاي ؟ شايف الابتسامة المرسومة علي وشك من عندي ، إذن كله بيحصل لمصلحتنا بس احنا بننسي وفاكرين الكون واقف ضدنا والحياة جاية علينا ، وهي ولا رايحة ولا جاية احنا اللي نسينا أصلنا الحقيقي ونسينا إنها لعبه روحية اخترناها لنتطور
٥- طيب دا الاتفاق اللي قبل ما ننزل. ايه اللي خلاني أخوض التجربة دي ؟
عشان
أ- تحس المشاعر : انت كروح عندك المعلومات ان التجربة الأرضية دي تجربة مشاعر اللي بينجح فيها هو الي بيجرب كل المشاعر ( الضدين ) باستمتاع وتقبل تام ، فأنت حابب انك تجرب كل المشاعر ، ايه الشعور اللي هحسه لما احقق هدفي ولما امرض ولما احب ولما انفصل ولما انفعل علي حد ولما ينتقل حد عزيز للحياة الأخري وهكذا من المواقف
غلطنا لما صنفنا المشاعر و قررنا بس نحس المشاعر الحلوة السعادة والحب والأمان والحرية والتسامح وأنكرنا ورفضنا ومش عاوزين نحس المشاعر اللي طاقتها منخفضة زي الغضب والحقد والكره والخوف والألم والتردد. طب والحل؟
استمتع بالمشاعر الحلوة واشكر ربنا عليها عشان تزيد ولما تعدي عليك المشاعر التانية اتقبلها وافهم الرسالة من المشاعر دي ، هو الغضب عاوز يعلمني ايه ؟ هو الألم الذي يعتبر أفضل معلم عاوز يعلمني ايه ؟ لأن كل ما زاد تقبلك كل ما زاد تطورك. التطور في التقبل
يبقي حلاوة التجربة الأرضية في انك تحس كل المشاعر الحلوة علي قلبك والتقيله شويه لإن كل ما هترفض الشعور ومش عاوز تحسه فتكبته جواك هيتحول لمرض لانه لازم يفرغ عن نفسه فيا اما تفرغه برادتك يا هيتفرغ غصب عنك
تقبل الخوف وافهم رسالته واسعي نحو الحب والأمان
تقبل الغضب وافهم رسالته واسعي نحو الهدوء والروقان
تقبل الفقر وافهم رسالته واسعي نحو الوفرة والثراء
تقبل المرض وافهم رسالته واسعي نحو الصحة والعافية
لحد ما هتوصل لمرحلة إنك تبقي أكبر من الازدواجية, مش هتقول دا موقف ايجابي ودا سلبي الاتنين بيعلموك
هتشوف الخير مبطن في كل حاجة في الفقر والغني في الصحة والمرض في السعادة والحزن شايف الخير في كل حاجة بتحصل حرفياً لإن بقي عندك يقين إن كل حاجة بتحصل في الكون للصالح العام وتطور الإنسانية
ب- تطور من عيوبك : وانت روح اخترت عيوبك ومميزاتك (افتكر شكلك وانت بتحمل اللعبة وبتختار كل الصفات) انا هختار اني بتردد واكون تابع مش مستقل بذاتي وبتعصب ومش بتحكم في شهوتي ومش بعرف اعمل فلوس وبخاف فهنزل الارض عشان احس الاحاسيس دي واستمتع بتجربة تغييرها وابقي واثق من نفسي وشجاع ومستقل وهادي ورايق وبتحكم في شهوتي وابقي غني ومتطمن
فلما يجي موقف وانت تتعصب, دا جاي عشان يعلمك تبقي هادي ومتحكم في اعصابك وتتعلم متخليش حد يعرف يعصبك ، ولما تشتغل شغلانه مرتبها قليل مش عشان تفضل كدا طول عمرك لأ دا عشان تطور من نفسك وتبقي غني فكدا إنت اختبرت وجربت الاتنين الفقر واستمتعت ببناء الغني ، لما تشوف بنت حلوة في الشارع ومتعرفش تتحكم في نفسك دا موقف عشان يعرفك انك عاوز تشتغل علي التحكم في الشهوة وتبقي متحكم في مشاعرك، لكن اللي مش فاهم كدا يرمي اللوم عليها ويبرر التحرش بدل ما ياخد أي موقف بيحصل معاه ويتعلم منه
اسأل نفسك يا تري ايه هي العيوب اللي اخترت اطورها وانا روح ؟ وايه المميزات اللي عندي هتساعدني في نشر رسالتي صوتي حلو مثلا ، بعرف اعبر عن اللي جوايا بسهولة؟
ج- تنشر رسالتك في الأرض : بعد ما تفهم وتحب نفسك وتبقي حقيقي وصادق هتعرف انت عاوز ايه وايه اللي تقدر تقدمه للبشرية عشان كلنا نتطور ، مش لازم حاجة واو ممكن نشرك للسعادة والضحك والتفاؤل ممكن بوظيفتك او مشروعك الخاص المهم انك تكون بتعمل الحاجة الي بتحبها ومقتنع بيها لأنها حياتك انت مش حياتهم هما
د- للتواصل مع الخالق طرق كثيرة بعدد أنفاس البشر المهم تستشعر وجوده وقربه وحبه ليك طول الوقت ربنا بيحبك سواء انت فاكره او ناسيه سواء مؤمن بيه او لا أياً كان معتقدك أياً كان الذنب اللي انت عملته هو بيحبك علطول هو سندك وضهرك وفي أي وقت هتحتاجه هو موجود وبيبعتلك اللي يساعدك وياخد بإيدك بس انت خليك واثق وعندك يقين في كدا وانتبه لرسايله واشاراته, فمهم لو مش بتستشعر وجود ربنا معاك بالطريقة اللي اتربيت عليها جرب طريقة جديدة جرب تشوف أفكار جديدة وتكون محايد معاها يمكن تتذوق سعادة وقرب محستوش قبل كدا ، لو لحد النهارده مش بتمارس التأمل كعادة يومية في حياتك يبقي فايتك كتير يا صديقي ابدأ من النهارده
إقرأ أيضاً
بعض الطرق الفعالة لمعرفة رسالتك الروحية
الإشارات و الرسائل الكونيه التى تحذرك عندما تكون على الطريق الخطأ
الرسالة : ماهي رسالتك و غايتك في هذه الدنيا ( هام جداً )