هل مقولة لا شيء يأتيني أو يحدث لي سهلا تمثلك ؟

هل مقولة لا شيء يأتيني أو يحدث لي سهلا تمثلك ؟

 

هل إنت من نوعية الناس اللي بتواجه صعوبات ومعرقلات في معظم أمور حياتها بدون سبب واضح ولا تعرف السبب ؟
من زمان وانا بسأل نفسي لماذا لا يسير شيء بسهوله وسلاسه في حياتي ؟ وعلى رأي المثل الشعبي بلاقي في كل خرابه عفريت و دايما بيطلع لي خازوق في كل أمر أخوضه لحد من وقت قريب إكتشفت سببين مهمين لكده, طبقت واحد منهم و الثاني إلى الآن بواجه صعوبه في تطبيقه. الأول إكتشفت إن العسر مقترن بالبخل وده اتكلمت عنه كثير
زي بخل المشاعر وبخل المواقف والبخل المادي والأخذ فقط بدون تبادل عطاء وده بيجلب العسر و لكن حله بسيط وهو اني ابدأ اعتاد العطاء وبالتالي استحق اليسر ولكن رغم ده مازال في بعض العسر وصعوبه بتقابلني وقليل لما شيء بيخلص سهل ومن هنا اكتشفت السبب الثاني والأهم وهو معتقد ان : مفيش حاجه بتحصل او تيجي بالساهل

قلت طيب بسيطه, نغير المعتقد ونخليه ان كل حاجه بتيجي سهله ويسيره وكانت الصدمه إن الموضوع مش بالبساطه اللي متصورها. تعالي معايا استرجع كده ذاكرتك من الطفوله وشوف لو كان بيتقال لك نفس الكلام

بابا عايز اشتري لعبه، عايز فلوس، عايزين نخرج، عايز اعمل حاجه جديده

الردود المعتاده

بعدين، مش دلوقتي، لما ربنا يسهل، لما ييجي العيد، لما الضيوف يمشو، لما أقبض، اول الشهر، لو نجحت، لو سمعت الكلام

عارفين بقه يا شاطرين كان ايه اللي بيحصل بعد الوعود دي ؟ مكانش حاجه بتتم او بتتم بعد معاناه. طبعا بتكلم عن الآباء المتساهلين لكن في آباء تاني ردودهم بتبقى : لا، مش هينفع، مفيش فلوس، انت مبتحسش، حرام، غلط، عيب، إياك اسمع الكلام ده تاني. اتربينا ان عشان العيل ميتعودش ان الحاجه بتيجي سهله خصوصا اننا عايشين في عالم كده كله صعوبه, فإنت لازم تصعب الأمر على ابنك وتعوده ان الحياه كلها تعب ومشقه ومفيش حاجه بتيجي سهله واحنا نتيجه ده. أذكر زمان لما كنت بقول لأمي عايز حاجه تقولي بعدين ومتجيبش الحاجه في وقتها فسألتها, انتي ليه مش بتجيبي لي الحاجه وقت ما اطلبها رغم انك بتجيبيها بعدين, قالت لي : عشان لما تكبر ولو انت مش معاك ثمن الحاجه اللي عايزها ممكن تسرق أو تعمل حاجات غلط عشان تاخد اللي انت عايزه وبعدين الحياه مش بالسهوله اللي انت متخيلها ومفيش حاجه فيها بتيجي سهله زي ما انت متوقع او متعود في عيشتك مع ابوك وامك

بصراحه وقتها اقتنعت لكن بعد الوعي اكتشفت اني اقتنعت بمصيبة وإن ده تجهيز لعقليه فقر وتوقع للعسر والمشقه وعدم سهوله الحياه اللي أصبح برمجتي لاحقا. تخيلو لما ده أصبح برنامجنا اللي اتربينا عليه وبنكرره لنفسنا وبنمرره لغيرنا ولأولادنا. يعني كل العسر والمعاناه دي طلعت اننا بس بنكرر اسلوب حياه تبنيناه من أهلنا والمحيط والعقل الباطن مبيرحمش, بيكرر النمط وملوش دعوه صح ولا غلط لكن مش معنى كلامي انكم تحسو ان انتو ضحيه المجتمع او برمجه العقل الباطن لأن شعورك بالضحيه مش هيقدمك خطوه وكل اللي دخلته ده كان اختبارك الخاص عشان تتطور
طيب ايه المطلوب يا مستر ؟

المطلوب اولا انكم ترجعو بالذاكره وتشوفو ايه اللي اتبرمجتو عليه في طفولتكم وكان بيمثل وضع عقبات وعسر زي المثال اللي وضحته

ثانيا مطلوب تتدربو على حاجات بسيطه تقررو تعملوها وتشوفوها ميسره وتعتادو اليسر ده. مثلا لو رايح مصلحه حكوميه تخلص أوراق شوف الأمر مر بسلاسه و تيسر

هتشتري شيء متحطش فيه خوازيق وتتوقع ان حاجه غلط هتحصل وهيجيلك فيه مشكله او ناقص

نويت تخرج مع ولادك, أنوي ان كل شيء في الخروجة سهل وميسر بمعنى متصنعش لنفسك صور بالمعرقلات المحتملة
راقب كويس كل الصور المعرقله المحتملة واستبدلها بصور فيها يسر وسلاسه ولو اليوم هربت منك المراقبه وشوفت المعرقلات بس سامح وتقبل نفسك وأبدأ من جديد

الموضوع مش صعب هو عايز وقت وإعتياد. كل يوم إنوي أن كل امورك ميسره, اصنع وجهز صور ميسره وشوفها متحققه, تذكر بس ان التدرج سنه الحياه ولا تمل او تيأس لأن الموضوع يحتاج فقط بعض الوقت

 

إقرأ أيضاً

مرت ثلاث سنوات منذ بديت عادة التامل : تغير مزاجي 180درجة للافضل

غيرت تفكيري فتغيرت حياتي : أنا الآن لست ما عليه من قبل

كيف تجذب و تخلق وعي ثروة إيجابي

أنت ما تُفكر به

 

 

عمرو أبو مازن

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *