عضلات البطن ، الدهون وكيفية التخلص منها

عضلات البطن ، الدهون و كيفية التخلص منها

عضلات البطن ⁉️والسيكس باكس( six packs) 

والدهون في منطقة البطن وازاي أتخلص منها 

كلها تساؤلات مهم جداً نعرف حقيقتها علشان محدش يخدعك أو يضحك عليك سواء في التدريب أو الجيمات

خلينا أولاً متفقين علي قاعده لا جدال ولا نقاش فيها
وهي مفيش حاجه إسمها تمرين بطن بيخسس البطن أو بينزٍّل الكرش

واللي يقولك غير كده بيضحك عليك ولو مشيت وراه شهور وسنين مش هاتحقق معاه أي هدف غير هدة حيلك بدون أي إستهداف للمنطقه دي

دهون البطن ((الكرش)) هي في الأصل من مجموع دهون الجسم كله
يعني لازم أنزٍّل دهون الجسم كله بنظام غذائي
عليه عامل %70

ونظام رياضي متكامل (كارديو+مقاومه )
عليه عامل %30

علشان يحرق دهون الجسم كله مش البطن بس ومش أساسه تمارين البطن نهااااائي ((خللي بالك وركٍّز))

طيب أومال إيه فايدة تمارين البطن 

تمارين البطن زيها زي أي تمارين بتقوي عضلات البطن نفسها

علشان لما الدهون تنزل من الجسم كله ومنها البطن يبقي جسمك مشدود وقوي ومفيش ترهلات

بالإضافه الي انها بتخلي عندك قوة تحمل وقدره علي ممارسة حياتك اليوميه بدون الم في عضلات الظهر أوالفقرات

طيب والسيكس باكس (six packs)
أو عضلات البطن السته البارزه بيوصلولها إزاي الأجسام الموديل والفيت وغيرهم 

هاقولك أنا الخلاصه
كلنا كبشر موجود عندنا السيكس باكس
(خلقة ربنا اصلا )
لأن هي العضلات الأساسيه للبطن

لكن إزاي تكون بارزه وظاهره والبطن تكون مشدوده

هو ده السر

بإنك تتخلص أولاً من دهون الجسم بشكل كُلي زي ماقولنا فوق

وتوصل لمرحلة التنشيف واللي بتكون فيها نسبة الدهون في جسم الإناث من %20:25.

وفي جسم الرجال%8:15

وهنا بيكون دور تمارين البطن اكتر فاعليه في إظهار عضلات البطن أكتر وبروزها بشكل fitt جميل ورائع

طيب يعني أنا دلوقتي عندي كرش
مالعبش تمارين بطن خالص⁉️ …….ولاًّ أعمل إيه ⁉️

أول حاجه هاتعملها علشان تخسس منطقة البطن والكرش هي

نظام غذائي ممتاز علي أساس علمي مدروس ينزٍّل دهون جسمك بشكل عام
وبالتالي هاينزل معاها الكرش وهاتبقي منبهر بالنتايج وأوعدك بكده

تاني حاجه نظام رياضي متكامل لكل عضلات الجسم بتكنيك معين
وانصحك تكون مع متخصص مش أي لعب وخلاص

وهاتدخًّل فيه كل التمارين بشكل مدروس صحيح ومنها تمارين البطن كمان
لأننا متفقين إن التمارين هي تقويه
مش تنزيل وتخسيس

وتمارين البطن مش هتكون بشكل يومي علشان ماتجيبش معاك نتايج عكسيه

طيب معلش طولت عليكي

ليه لو عملت تمارين بطن كل يوم أو بشكل عشوائي هاتجيب نتايج عكسيه وبطني تكبر أكتر ⁉️هي ناقصه

لأن ببساطه إنت عمًّال تشتغل علي عضلات البطن بتمارين تٍظهرها وتبرزها وفوقها طبقات وطبقات من الشحوم والدهون فطبيعي العضله عماله تكبر وتعلٍّي معاها طبقات الدهون وبالتالي البطن عماله تظهر أكتر وأكتر

تمام فهمت شكرا جزيلا
الحمد لله عفوا جزيلا

وليك مني هديه في الكومنتس
أقوي التمارين لتقوية عضلات البطن العلويه والسفليه والخواصر

لكن طبعا إنت فهمت الهدف من تمارين البطن وهاتلعب صح

ودايما معانا خليك فاكر
صحتك بداية سعادتك