حقل الألغام
تجاربنا و خبراتنا السابقة بتتخزن جوة مكان عميق في العقل،
بتستخبى تمامًا عن السطح و يتم دفنها و تناسيها من العقل الواعي
لكنها تبقي كلغم مدفون داخل طبقات عميقة من اللاوعي،
يبقى ليها مكان معين له إحداثيات دقيقة
الإحداثيات هي الظروف و المشاعر المحيطة باللغم أثناء أول مرة أتكون فيها.
فلو مثلا آخر مرة حسيت فيها مع حد بالأمان و بعدين تعرضت للهجر أو الخيانة او الخُذلان أو التخلى أو الاستخفاف أو الظلم
يبقى كل مرة أقرب من حد و اسمحلو بأختراق طبقات الحماية داخل قلبي ، هيتم تفعيل اللغم ،
هيتم إيقاظ الذكرى القديمة و تنشيطها ليبدأ العد التنازلي للإنفجار!
عقلي الواعي متخدر و مش فاكر و لا حاسس بأي حاجة،
العقل اللاواعي يبدأ في العمل لتأكيد القناعة و إفتعال الأحداث و المواقف لتأكيد الفكرة عن الطرف التاني لحمايتنا من تكرار ألم التجربة السابقة .
فمثلا لو تعرضت قبل كدة للخيانة ، هيبقى عندي حساسية رهيبة لرصد علامات الخيانة
و بدون ما أشعر عقلي هيتآمر عليا لدفع الطرف التاني للإقتراب من الخيانة من كتر مشاعري ما هي متأكدة من دة
أو لو تعرضت قبل كدة للظلم هشوف دائما كل الناس بتظلمني و تتهمني بالباطل و أتحول لشخص دفاعي طول الوقت متأهب للخطر
« What you truly believe will come true »
المشاعر هنا بتحرك الأفكار و بالتالي يتم إدراك الواقع بطريقة فيها تشويه و تحريف و إنتقاء للأحداث
»Cognitive bias »
و يتم توجيه الطرف الآخر لتحقيق نبوءة مشاعري و الدخول في لعبتي اللي أنا أصلا مش عارف إني بلعبها لأن العقل الواعي متخيل أنه شايف الحقيقة
الحقيقة أنه شايف نبوءة ذاتية بتحقق و ليس الحقيقة
وفجأة بدون مقدمات ينفجر اللغم
و تفرقع العلاقة
علشان بس قربت من اللغم القديم
و نشطته.
علشان بس سمحنا لحد أنه يقرب قوي
و نسينا نكشف عن الألغام القديمة و نعمل لها إبطال للمفعول “ deactivation “!
مفيش مشاعر بتتنسي
مفيش تجربة مؤلمة بتختفي لوحدها
لو عندك لغم قديم أوعى تحكم على حد حكم مطلق،
لازم يكون الأول عندك نسبة شك أن دة ممكن يكون اللغم بتاعك فرقع في وشك .
لأن كل مرة بيفرقع فيها لغم ، فيه حتة فيك بيتكون فيه جرح سايب علامة جوة قلبك
علاقات كتير بتنتهي للسبب دة
و كل طرف فاكر الطرف التاني هو اللي ظلمه
الحقيقة أن كل واحد فيهم ظلم نفسه بدون ما يشعر
و كل واحد فيهم دفع فاتورة خذلان حد قبله
خذلان الأم الغير مدرك من الأبن ، بيدفع تمنه الزوجة
خذلان الأب الغير مدرك من البنت ، بيدفع تمنه الزوج
و أول ما يتجوزوا تبدأ الحرب
لأن العقل اللاواعي دائما بيعمل تعميم علشان يحسن فرصتنا في البقاء.
و يفتكر الأتنين أن هما اللي خذلو بعض و خدعو بعض ووجعو بعض
إنما الحقيقة أنهم بس قربو من بعض لدرجة تفجر الألغام القديمة و تنشطها
أتمنى الأجيال القادمة يكون عندها الوعي الكافي للتعرف على ألغام الماضي و إبطال مفعولها علشان الجيل الجديد يبدأ في سلام و ميدفعش فاتورة حروب سابقة لم يختار الدخول فيها
“ Mine fields “ are actually mine !
إبطال_مفعول_اللغم
تمشيط_اللاواعي
الادراك_الانتقائي
رانيه_مصطفى_محمود